သံသရာ ခရီးသည်

ကျနော် မွေးတဲ့ ဇာတိမြို့လေ တနင်္သာရီတိုင်းမှာရှိတယ်။ နွေ၊ မိုး၊ ဆောင်း ရာသီတွေနဲ့ သိပ်လှတဲ့ ကမ်းရိုးတန်း မြို့ကလေးပါ။ အရင်တုန်းကတော့ ပူရိယက္ခတိုင်း ခေါ်တယ်လို့ ပါးစပ်ရာဇ၀င်ကတော့ ပြောကြတာပဲ။ ဘီလူးတွေနေတဲ့ တိုင်းပြည်ပေါ့။ နောက်တော့ တိုင်းသူပြည်သားတွေက ဘီလူးတွေကို ကြောက်တော့ စုန်းအတတ်ကိုသင်လာကြတယ်။ ကြည့်ရတာ ၁၂ ကြိုးတို့ ၁၃ ကြိုးတို့က ဘီလူးတွေကိုနိုင်တယ်ထင်တယ်။ အခုတော့ ဘီလူတွေမတွေ့ရတော့ပေမယ့် ပညာသည်တွေကတော့ အများကြီးမှ အများကြီးပဲကျန်နေခဲ့တယ်။ ဒီပညာသည်တွေကြောင့်လည်း ကျနော်တို့ အဲဒီမြို့လေးက ပြောင်းဖြစ်သွားတာ။ ပညာသည်တွေအကြောင်းကတော့ တိုက်ဆိုင်တဲ့အခါ ပြောပြပါ့မယ်။

မြို့အင်္ဂါရပ်နဲ့ ညီလို့သာ မြို့ခေါ်ကြတာ။ တကယ်တော့ ထားဝယ်၊ မြိတ်၊ ကော့သောင်း တို့လိုစီးပွားရေးမြို့မဟုတ်လေတော့ သိပ်မစည်ကားဘူး။ ဒါပေမယ့် နေရတာ အေးချမ်းတယ်။ တနင်္သာရီတောင်တန်းက ခွဲထွက်လာတဲ့ တောင်စွယ်လေးတွေထင်တယ်။ ကျနော်နေခဲ့တဲ့ မြို့ပတ်ဝန်းကျင်က တောင်ထူထပ်တယ်။ အပြိုင်သွားနေတဲ့ တောင်တန်းနှစ်သွယ်ကြားထဲမှာ ပုလောချောင်းလေးက ကွေ့ကောက်စွာစီးဆင်းနေတယ်။ ချောင်းတဖက်ကိုမေးတင်ပြီး တောင်စောင်းမှာတည်ထားတဲ့မြို့လေး ဘယ်လောက်လှလဲဆိုတာ ပြောမပြတတ်အောင်ပဲ။

ကျနော်နေတဲ့အချိန်က လူဦးရေ သုံးသောင်းကျော်ရှိတယ်။ အိမ်ခြေဘယ်လောက်ရှိလဲတော့ မသိဘူး။ ရပ်ကွက် ၆ ခုရှိတယ်။ မူလတန်ူကျောင်း ၄ ကျောင်း၊ အလယ်တန်းကျောင်း ၁ ကျောင်း၊ အထက်တန်းကျောင်း ၁ ကျောင်းရှိတယ်။ မြို့လယ်မှာ ဈေးရှိတယ်။ ရုပ်ရှင်ရုံ၊ စားသောက်ဆိုင်တွေ၊ အဝေးပြေးကားဂိတ်ရှိတယ်။ ပုံမှန်အားဖြင့်တော ၁၁ မိုင်ဝေးတဲ့ ပလ ဆိုတဲ့ရွာအထိပဲ ကားဆွဲတယ်။ ရာသီဥတု သိပ်သာယာရင်တော့ မြိတ်မြို့ တဘက်ကမ်း ကျွဲကူးရွာအထိပေါ့။ ထားဝယ်မြို့ကို သွားချင်ရင်တော့ ပုလောချောင်းတဖက်ကမ်းမှာရှိတဲ့ တောင်ယာကမ်းရွာကို ကူးပြီးတော့မှ တဆင့်သွားရတယ်။ ကားလမ်းက ဓါးပြတိုက်ရင် စက်လှေနှင့် သွားလိုက် ရေလမ်းက ဓါးပြတိုက်ရင် ကားလမ်းပြန်ပြောင်းလိုက်နဲ့ လူတွေသနားဖို့လည်းကောင်းပါတယ်။ သူပုန်တွေလည်းပေါမှပေါပဲ။ ပုလောမြို့ထဲတော့ ဘယ်လာကြမလဲ။ ချောင်းဘက်ကတောင်ကုန်းမှာ ရဲစခန်းရှိတယ်။ မြို့ဟိုဘက်ထိပ်တောင်ကုန်းမှာ စစ်တပ်ရှိတယ်လေ။ ဒီတော့ မြို့ထဲမှာတော့ သာသာယာယာပဲပေါ့။